БИШКЕК, 13-сен. — Sputnik. XI кылымга таандык жер алдында жайгашкан күмбөз Нарындын Кочкор районунан табылды. Бул тууралуу археолог, казуу иштеринин катышуучусу Кубатбек Табалдиев билдирди.
Анын айтымында, аталган күмбөз тууралуу 1987-жылы маалым болгон. Жергиликтүү тургундар Табалдиев менен анын кесиптеши Орозбек Султановго Көк-Таш аймагын көрсөтүп беришкен. Кийин ал жактан байыркы курулуштун калдыктары табылган. Изилдөө иштери каржылоо булагы табылар замат башталган.
"Күмбөз эки бөлмөлүү экен. Объектинин узундугу 9, туурасы 5 метрге жетет. Бул табылга жер алдында жайгашканы менен уникалдуу. Анын жарым шарга окшогон төбөсү дагы сырттан көрүнбөйт. Кыргызстанда мындай күмбөздөр буга чейин изилденген эмес", — деди Табалдиев.
Археолог күмбөздүн жанында дагы башка объектилер болушу мүмкүн экенин билдирди. Аталган аймактан керамикалык идиштер дагы табылган.
