БИШКЕК, 9-cен. — Sputnik. Мексикада болгон жер титирөө 58 адамдын өмүрүн алып кетти. Бул тууралуу РИА Новости аталган өлкөнүн Улуттук куткаруучулар кызматынын жетекчиси Луис Фелипе Пуэнтеге шилтеме берүү менен жазып чыкты.
Луис Фелипе Пуэнтенин айтымында, Охакеде 45, Чиапаста 10, Табаскодо үч адам каза болду. Жалпы набыт болгондордун саны 58ге жетти.
Каргашалуу окуядан улам өлкө президенти Энрике Пенья Ньето үч күнгө аза күтүүнү жарыялап, бул акыркы 100 жылдагы эң күчтүү зилзала болгонун айткан. Аза жума күндөн баштап күтүлүүдө.
Эске сала кетсек, Мексикада катталган жер силкинүүнүн күчү 8,2 баллга жетип, жергиликтүү убакыт боюнча 04:49да (Бишкек — 10:49) болгон.
Катуу жер силкинүүдөн улам тынч океандагы толкундардын бийиктиги бир метрге жеткен.
