БИШКЕК, 7-сен. — Sputnik. Төкмө акын Идирис Айитбаевге Өзбекстандын президенти Шавкат Мирзиеёв автоунаа жана Анжияндан турак жай белекке берди. Бул тууралуу Sputnik Кыргызстан агенттигине Ош шаардык мэриядан билдиришти.
Анжиян облусунун акими Шукрат Абдурахмонов кыргыз-өзбек чек арасынын "Достук" көзөмөл өткөрүү жайынын ачылышында сүйлөп жатып Өзбекстан президентинин тапшырмасы менен кыргыз акынына атайын автоунаа жана үй даярдалганын билдирген.
Маалыматка караганда, акынга Chevrolet Malibu үлгүсүндөгү унаа тартууланат.
Идирис Айитбаев өзүнүн Facebook баракчасына президенттер Алмазбек Атамбаев менен Шавкат Мирзиеёвдин алдында эки элдин арман-дартын жана достугун айтып ырдаганын жазган.
"Алмаз Шаршеновичтин мага болгон ыраазычылыгын жана кубанычын көрүп төбөм көккө жетти. Бооруна кысып "ата-энеңе рахмат, бизди аябай кубанттың" дегени алигиче кулагыман кетпей жаңырып турат. Ошол эле учурда Шавкат Мирамоновичтин ордунан тура калып жардамчыларына менден белек катары автоунаа жана Анжияндан үй берилсин деген тапшырмасынан өмүрү эл алдында толкундабаган денемди калтырак басты", — деп кубанычын бөлүшкөн ал.
Белгилей кетсек, Идирис Айитбаев 31-августта айтылуу акын Тууганбай Абдиевдин 80 жылдыгына арналып кыргыз-казак айтышында беш тилде төгүп ырдаганы көрүүчүлөрдүн көңүлүн көтөргөн. Айтыштын жыйынтыгы менен ал 3-орунду ээлеген.
