БИШКЕК, 6-сен. — Sputnik. Милициянын формасын кийген кишилер Бишкектен туристтерди тоноп кетишти. Бул тууралуу Facebook социалдык тармагына Аскат Чыналы деп катталган колдонуучу баракчасына жазды.
"Бүгүн менин көз алдымда "Спартак" стадионунун жанынан Европадан келген туристтерди тоноп кетишти. Эки туристти тегеректеп калган милиция кызматкерлери алар менен бир нерселерди сүйлөшүп, дароо ары жакка чуркап кетишти. Туристтер милиция кызматкерлери алардын бардык акчасын уурдап кеткенин айтышты", — деп жазды ал.
Анын айтымында, туристтерди тоногон кишилер күмүш түстөгү Audi-4 автоунаасына отуруп, окуя болгон жерден из жашырып кетишкен.
"Алар туристтерди коркуткан жок. Болгону алардын колундагы акчаны көрүп, өздөрүн милиция кызматкери катары тааныштырган. Көрсө алар акча жасалма деген шылтоо менен алып коюшкан экен", — деди Чыналы.
Ал ошондой эле чет элдиктерди үйүнө түнөткөнүн, алар акчасын тартып алгандардын үстүнөн милицияга арыз жазуудан баш тартышып, өлкөнү кыдырууну улантарын айтышканын кошумчалады.
Бишкек ШИИБдин маалымат кызматы аталган фактыны текшерип жатканын билдиришти.
