БИШКЕК, 3-сен. — Sputnik. Өзгөн районунда үч автоунаанын катышуусунда жол кырсыгы катталганын күбө Sputnik Кыргызстан агенттигине WhatsApp каналы аркылуу билдирди.
Маалыматка ылайык, жол кырсыгы 3-сентябрда саат 8.00дөр чамасында болгон. Toyota Estima жеңил унаасы алдыдагы унааны ашып өтүү үчүн каршы тилкеге чыкканда Ford Transit автомашинасы менен бетме-бет кагышкан. Анын кесепетинен Ford Transit сүрүлүп барып Toyota Corolla менен кагышып, оодарылып кеткен.
Аталган кырсык катталгандыгын Ош облустук ички иштер башкармалыгы дагы тастыктап, каза болгондор жок экендигин маалымдады.
"Үч унаа Бишкек — Ош жолунун 609-чакырымында кырсыкка кабылган. Унаалардын ичинде жүргүнчүлөр болгон эмес. Айдоочулар түрдүү жаракат алып, жакынкы ооруканага жеткирилди. Учурда абалдары канааттандырарлык", — деп облустук милициядан билдиришти.
Учурда тиешелүүү экспертизалар дайындалып, тергөө амалдары уланууда.
