БИШКЕК, 26-авг. — Sputnik. Казакстанда социалдык тармак колдонуучуларынын арасында кыз ала качуу боюнча видео катуу талкууланып жатканын Sputnik Казакстан маалымат агенттиги жазып чыкты.
Маалыматка ылайык, интернет колдонуучу Александр Цой өзүнүн Facebook баракчасына ала качуунун видеосун жарыялаган. Анда жол тандабастан бир адам жаш кызды үйгө колуна көтөрүп кирип кетет. Чогулган коноктор менен баланын туугандары кызды күч менен отургузуп, жоолук салууга аракет кылышкан.
Андан сырткары, кыздын ыйлаганына жана каршылыгына карабай жеңелер менен энелер "Болду ыйлаба! Антпесе азыр кубалап, кайра албай коебуз" деп коркутканын көрүүгө болот.
Жарыяланган бидирүүгө Булат Исай аттуу интернет колдонуучу видеонун автору улут аралык жаңжалды баштап, жарандарды кылмыш жоопкерчилигине тартууга үндөп жатканын билдирип, каршы чыккан.
"Ал өзүнүн видеосу менен биздин элдин каада-салттын түшүндүргүсү келип жатат. Мындайча айтканда, биздин үрп-адаттарды жамандоодо", — деген ал.
Мындай пикирлерге каршы экендигин билдиргендер дагы жок эмес. Цойду коргоп дагы бир жаран видеодо кылмыш көрсөтүлгөндүгүн эске салган.
"Сиз уят болдуңуз. Анткени Казакстандын жараны катары аялдарга карата колдонулган кордукту мактап кыйын болуп жатасыз. Мен мындай кадаа-салтты билбейм жана мындай аракеттерге каршымын. Мен дени сак коом жана үй-бүлө үчүн күрөшөм. Кыздарды уурдаган кулчулукка каршымын", — деп Дина Тансари аттуу пайдалануучу жооп кайтарган.
Казакстанда адамды уурдагандар Кылмыш жаза кодексинин 125-беренесине ылайык төрт жылдан жети жылга чейин эркинен ажырайт. Эгер бул кылмыш көп адамдын катышуусунда жасалса, жети жылдан 12 жылга чейин соттолуп, мүлкүнөн ажыратылат.
