БИШКЕК, 25-авг. — Sputnik. Премьер-министрликке талапкер Сапар Исаков парламенттеги көпчүлүк коалициянын алдында сүйлөп жатып, Кыргызстан насыя алууну улантарын айтты.
Депутат Айтмамат Назаров өлкө бюджетинин таңкыстыгы күч экенин, ал насыянын эсебинен жабылып жатканын, мындан улам мамлекеттик карыз өсүп жатканын эске салды.
Исаков мамлекеттик карыздын деңгээли ИДПнын 53-54 пайызын түзөрүн белгилеп, Россия карызын кечкенден кийин сумма бир топ кыскара турганын кошумчалады.
"Бирок биз насыя алууну улантабыз, анткени өлкөнүн өнүгүшү жана туризм жаатындагы долбоорлорду өнүктүрүшүбүз керек", — деди Исаков.
Назаров насыя акчаны долбоорлор боюнча гана алууга чакырды.
30-июнга карата мамлекеттик карыздын көлөмү 4 миллиард 245 миллион долларды түзөт, анын 3 миллиард 871 миллион доллары тышкы карыз болуп саналат.
