БИШКЕК, 25-авг. — Sputnik. Казакстандык улакчы Александр Пупенко кыргыз улакчылары менен болгон беттеште казак курама командасы жеңишке жетерине ишенерин билдирди. Бул тууралуу Sputnik Казакстан агенттиги жазып чыкты.
Анын айтымында, казак улакчылары кыргыздардан чемпион статусун кайтарып алуу үчүн үч ай катуу даярдыктан өтүшкөн.
"Алгач улакчылар тоодо машыгып күч топтодук. Кийин аттар менен Тараз шаарында машыктык. Ал эми үчүнчү этаптагы машыгуу Астанада өттү. Алдыдагы финалдык оюн кызуу өтөт. Өзүбүздүн жерибизде жеңишти алдырбайбыз деп ойлойм. Мындай мүмкүнчүлүктү колдон чыгарбайбыз", — деди Пупенко.
Астанада "ЭКСПО-2017" эл аралык көргөзмөсүнүн алкагында түрк элинин салттык спортуна кирген "көкпар" (көк бөрү) оюну боюнча дүйнө чемпионатынын бешинчи күнү жыйынтыкталды. Оюнга 11 өлкө катышып Кыргызстан менен Казакстандын командалары финалга чыкты. Эки өлкөнүн беттеши жекшемби күнү болмокчу.
Оюндун бешинчи күнүнүн жыйынтыгы төмөндөгүдөй болду:
- Кыргызстан — АКШ: 11:6
- Казакстан — Венгрия: 12:3
- Тажикстан — Монголия: 10:9
- Өзбекстан — Түркия: 11:3
- Кытай — Афганистан: 4:2
Россия Азербайжан келбей калганы үчүн жеңүүчү деп табылды.
