Көкпарга катышуу алдында Кыргызстан курама командасынын аттары атайын машыгуудан өткөн. Бул тууралуу Көк бөрү федерациясынын вице-президенти Жыргалбек Саматов билдирди.
Эскерте кетсек, Кыргызстан командасы кечээ эртең менен така чырынан улам программа боюнча Монголия менен беттешүүгө белгиленген убакытта чыкпай калганы үчүн оюндан жеңилди деп эсептелинген. Кийинчерээк сүйлөшүүлөрдөн кийин оюн болуп, Кыргызстан Монголияны 4:0 эсебинде утуп алды.
"Аттардын баары атайын машыгуудан өтүп, тапталып келген. Жободо аттын арткы буттары боюнча эч нерсе жазылган эмес экен. Алдыңкы эки бутуна гана така такпасын деген талап бар. Ушундан улам талаш маселе жаралып, дүйнөлүк жобого таянуу менен маселе чечилди", — деди Саматов.
Казакстанда "ЭКСПО-2017" эл аралык көргөзмөсүнүн алкагында түрк элинин салттык спортуна кирген "көкпар" (көк бөрү) оюну боюнча дүйнө чемпионаты 20-28-август күндөрү Астананын "Казанат" ат майданында өтүүдө.
