БИШКЕК, 15-авг. — Sputnik. Иран парламенти АКШнын кезектеги санкциясына жооп кылып Ракета программасын каржылоого жана Ислам ыңкылабынын коргоочулар корпусуна 500 миллион доллар бөлүүнү шарттаган мыйзам долбоорун колдоду. Бул туурасында Синьхуа агенттиги жазды.
Аталган документти 244 депутаттын 240ы колдогон. Мыйзам долбоору эми Баш мыйзамды коргоочулардын кеңешине берилмекчи.
Мыйзам долбоорунда АКШ армиясынын жана коопсуздук органдарынын бир катар өкүлдөрүн кара тизмеге киргизүү каралып, аларга Ирандын аймагына кирүүгө тыюу салынган.
Иран межилисинин төрагасы Али Ларижанинин айтымында, Вашингтон өзүнүн кадамдарына жооп бериши керек. Ал аталган мыйзам долбоору "АКШнын аталган аймактагы авантюристтик кадамдарына каршы жасалган алгачкы кадам" экендигине токтолгон.
Эске сала кетсек, Дональд Трамп АКШ президентигине расмий киришкенден кийин алар Иранга каршы санкциялардын мөөнөтүн узартып, андан сырткары ирандыктардын Америка аймагына киришине чектөө койгон. Мунун баары орто чыгыштагы өлкөнүн ракета учурууларынан болду деп жазган агенттик. Августтун башында Трамп Россияга, Түндүк Кореяга жана Иранга жаңы санкцияларды киргизүү боюнча мыйзам долбооруна кол койгон.
