БИШКЕК, 14-авг. — Sputnik. Ысык-Көлдө өткөн "Ала-Тоо таңшыйт" эл аралык музыкалык фестивалынын алкагында келгендер "Алгыр куш" этнофестивалына да күбө болушту. Бул тууралуу аталган иш-чаранын уюштуруучулары билдирди.
Эскерте кетсек, фестиваль Чолпон-Ата, Балыкчы шаарларында башталып, "Ысык-Көлдү таза сактайлы" акциясы менен коштолду.
"Тоң районунун Көк-Сай айылындагы Жайчы жайлоосунда жыйынтыкталып, салтанатта "Алгыр куш" фестивалы тартууланды. Республиканын ар тарабынан келген мүнүшкөрлөр өз өнөрүн көрсөтүп, келгендердин черин жазышты. Иш-чарага 400гө чукул чет элдик келди", — дешти уюштуруучулар.
Фестивалда кыргыз өнөрпоздору элдин көңүлүн ачып, "Кара жорго" бийи менен белгилүү музыкант Асылбек Насирдиновдун "Улуу көч" чыгармасы чет элдиктердин көңүлүн өзгөчө бурганы айтылды.
Быйыл аталган иш-чара биринчи ирет эл аралык масштабда өттү. Анын негиздөөчүсү Ырыс Окенова бул фестивалды жыл сайын Кыргызстандын ар бурчунда өткөрүү ниети бар экенин айткан.
