БИШКЕК, 8-авг. — Sputnik. Быйылкы окуу жылында дагы Кыргызстандын окуучулары министрлик тарабынан бекитилген мектеп формасынын бир канча түрүн кие турганын Билим берүү жана илим министрлигинин мектептик, мектепке чейинки жана мектептен тышкаркы билим берүү башкармалыгынын башчысы Марат Усеналиев Sputnik Кыргызстан агенттигине билдирди.
"Бир эле мектепте финансылык мүмкүнчүлүктөрү ар башка үй-бүлөлөрдүн балдары окугандыктан, кыйнап бир форманы таңуулоого мүмкүн эмес. Ошондуктан мектеп формасынын стандартына киргизилген бир нече формалардын бирин мектеп менен ата-энелер комитети кеңешип туруп тандап алышат", — деди министрликтин өкүлү.
Анын айтымында, стандартка кирген мектеп формасынын негизги түрлөрү төмөнкүлөр:
- үстү ак, асты кара;
- көйнөк-шым же көйнөк-юбканы чыптама менен айкалыштыруу;
- көйнөк-шым же көйнөк-юбканы бешмант менен айкалыштыруу;
- көйнөк-шым же көйнөк-юбканы бешмант жана чыптама менен айкалыштыруу;
Ошондой эле Ысык-Көл жана Баткен облустарынын айрым мектептеринде билим алган кыздар Советтер Союзу учурундагыдай күрөң түстөгү форма, фартукту кийип жатканы кошумчаланды.
Түстөр боюнча айтсак, мектеп формасынын кездемелери ак, кара, боз, көк, кочкул кызыл жана ушул түстөрдөгү чатыраш болушу керек.
Белгилей кетсек, 2014-жылы Кыргызстандын мектептерине бирдиктүү форма киргизүү аракеттери менен дизайнерлер арасында окуучулар үчүн формага сынак жарыяланган. Билим берүү жана илим министрлиги конкурсту жыйынтыктап, жеңүүчүнү аныктагандан кийин анын баасы боюнча ата-энелер арасында кайчы пикирлер пайда болгон.
Ал эми 2016-2017-жылкы окуу жылында министрлик бирдиктүү мектеп формасы болбой турганын айтып, бул боюнча атайын токтом жок экенин билдирген.
Министрлик тарабынан бекитилген мектеп формасынын стандарттарына 2014-жылкы сынактан жеңип чыккан үлгү дагы (кенже класстар үчүн үстү ак, асты боз жана кочкул кызыл бешмант, жогорку класстар үчүн үстү ак, асты кара жана боз бешмант) киргизилген.
