БИШКЕК, 2-авг. — Sputnik. Мурдагы депутат Садыр Жапаров 2013-жылы октябрда болгон митинг учурунда Эмилбек Каптагаевди барымтага алууну уюштурууга тиешеси бар деп 11 жыл алты айга кесилип, калган беренелер боюнча акталып чыкты.
Мындай өкүмдү Бишкек шаарынын Биринчи Май райондук соту чыгарды.
Садыр Жапаров менен жактоочусу соттун өкүмүнө макул эместигин билдирип, жогорку инстанцияга кайрыларын билдиришти.
Эске салсак, 2017-жылы 25-мартта УКМК Садыр Жапаровду чет өлкөдөн Кыргызстанга киргенде камакка алган. Экс-депутат Кылмыш жаза кодексинин 30, 113, 227, 341 жана 234-беренелери (Барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык) боюнча айыпталган.
Биринчи Май сотунун чечими менен аны №1 СИЗОго эки айга камакка алышкан.
Ал жактан Жапаровдун колунун кан тамырлары кесилип, 2-апрелде ооруканага түшкөн. Ал эми 13-апрелде №47 түзөтүү колониясынын ооруканасында жаткан экс-депутат Жапаров кайрадан №1 тергөө абагына которулган.
