БИШКЕК, 2-авг. — Sputnik. Бишкекте №215 маршрутканын айдоочусу жүргүнчүлөрдү жарым жолдон түшүрүп салган.
Бул тууралуу маалымат социалдык тармактарга тарады. Жарыяланган видеонун алдына айдоочу жүргүнчүлөрдү унаанын эшигин сыртынан жаап коюну талап кылганы жазылган.
Тасманы тартып алган кишинин айтымында, окуя саат 23.30дар чамасында болгон. Айдоочу эч нерсе түшүндүрбөстөн унаасын Манас проспектиси менен Киев көчөлөрүнүн кесилишинен токтотуп койгон.
10 мүнөт өткөндөн кийин жүргүнчүлөр ачуулана баштаган. Ал эми айдоочу кайда, качан барарын өзү билерин айткан. Жүргүнчүлөрдүн көбү үйлөрүнө жетүү үчүн дагы башка маршруткага жетүү керек экенин түшүндүрүшкөн.
"Ал айтканынан кайтпай туруп алды. Акыры "акчаңарды алып кете бергиле" деп койду. Бардыгыбыз чыгууга аргасыз болдук. Эл жакшы жашоодон улам түнкү саат 12де маршруткада жүргөн жок да", — деп видеонун автору жазган.
Бишкек шаардык мэриянын алдындагы транспорт башкармалыгынан Sputnik Кыргызстан агенттигине аталган факты текшерилип жатканын билдиришти.
"Ал айдоочуга карата кагаз түрүндө арыз келип түштү. Андагы маалыматка караганда, ал унаасын алгач Ош базарынан кийин Манас проспектисинен токтоткон. Сөзсүз түрдө чара көрүлөт. Учурда маалыматты текшерип жатабыз", — деп билдиришти.
Учурда аталган роликти 77 миң адам көрдү.
