Күн менен кошо Кыргызстанда саясат да ысып турган мезгил. Анткени октябрь айында өлкөдө президенттик шайлоо өтөт. Ага карата ажо болом дегендер биринин артынан бири БШКнын эшигин каккылай берип, аягы 59га барып токтоду. Анткени кечээ БШКда арыз кабыл алган акыркы күн болчу.
Ал ортодо президенттикке талапкерлердин бири Өмүрбек Бабанов маалымат жыйын өткөрүп, ага карата айтылып жаткан ушактарга жооп берип, агынан жарылды.
Ажолукка аттанам деп барып араң токтогон спикер Чыныбай Турсунбеков болсо эмне үчүн президенттик шайлоодон баш тартканын түшүндүрдү. Ошондой эле президент менен жолугуп эмнелер тууралуу сүйлөшкөнүн да маалымдады.
Азыркы президент Алмазбек Атамбаевдин кенже кызы Алия деле ажолукка аттанып жаткандардан кем калбай коомчулуктун назарында. Ал ВВС маалымат агенттигине берген маегинде анын ата-энеси баласын эмизип түшкөн сүрөтүн жайылтууга каршы чыкканын билдирген. Бирок ага карабай сүрөт жарыяланып, кийинчерээк кайра сүрөттөрдү социалдык тармактардан алып салган.
Өлкөбүздүн аты алыска жакшы жагы менен гана таанылсын. Кыргызстандын атын чет жерге угузуп жүргөндөрдүн бири — жаш бийчи Солто Эсенгулов. Ал America's Got Talent аттуу белгилүү музыкалык теледолбоордун катышуучусу болуп, сынактын үчүнчү туруна чейин өз өнөрүн көрсөтө алган.
Китеп — көп нерсенин булагы. Кыргызстанда белгилүү, атактуу адамдар кандай китептерди окуурун билгиңиз келеби? Анда дароо шилтеме аркылуу кириңиз. Балким сиз үчүн жакшы кеңештер чыгып калаар.
Көчөдөн көргөндөрдү ата-энесине окшоштуруп. Дача айылындагы авиакырсыктан тоголок жетим калган жети жаштагы Жакшылык Шералиев менен Султан Сыдыковдун азыркы абалын билүү максатында Sputnik Кыргызстан агенттиги балдардын чоң аталары менен байланышты.
Ажаткандан табылган ымыркай. Бишкекте ымыркай ажатканадан табылып, ал дароо ооруканага жеткирилген. Бирок дарыгерлер анын абалын оор деп баалашууда.
Бүгүн өлкөдө жаан-чачын күтүлбөйт.
Валюта наркы. Сомдун баасы долларга карата орто эсеп менен 68.62 (сатып алуу) жана 68.89 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгүсү 38.60 сом, АИ-95 үлгүсүндөгүсү 41.20 сом, ал эми дизель майы 36.60 сомдон сатылууда.
Соңку сөз. Жакшы болуш аста-аста, жаман болуу бир паста!
Эсенчилик тилеп, Таалайгүл Усенбаева.
