БИШКЕК, 28-июл. — Sputnik. Россиянын Федералдык коопсуздук кызматы Санкт-Петербург шаарында террористтик актыларды даярдап жаткан деген шек менен Борбор Азиядан чыккан жети адамды кармады. Бул тууралуу аталган кызматтын маалымат катчылыгынан кабарлашты.
Билдирүүгө караганда, алар бүгүн, 28-июлда, кармалышты.
Шектелүүчүлөр темир жол транспортунда жана эл көп чогулган жайларда теракт кылууга даярданып жатышкан.
"Иликтөөнүн кызыкчылыгы үчүн шектелүүчүлөрдүн аты аталбайт. Төргөө иштери жүрүп жатат", — деп айтылат билдирүүдө.
Белгилей кетсек, Санкт-Петербург шаарында 3-апрелде "Сенная площадь" жана "Технологический институт" метро станцияларынын ортосунда жардыруу болгон. Акыркы маалыматтарга ылайык, 15 киши каза болуп, элүүдөй киши түрдүү жаракаттарды алган. Бул фактынын негизинде Россиянын Тергөө комитети теракт боюнча кылмыш ишин козгогон.
