Президент 13-майда эмес, 12-майда кандай окуя болгонун айтты

БИШКЕК, 24-июл. — Sputnik. Өлкө башчы Алмазбек Атамбаев Өмүрбек Текебаевдин сотуна байланыштуу суроого жооп берип, 13-май эмес, 12-майда эмне болгонун айтты. Бул күн анын эсинде жакшы калганын кошумчалады.

Белгилей кетсек, Өмүрбек Текебаевдин соту Биринчи Май райондук сотунда уланууда. Анда 2010-жылы 13-майда россиялык ишкер Леонид Маевский ошол учурдагы Убактылуу өкмөттүн мүчөсү Текебаев менен жолугуп, MegaCom компаниясынын башкармалыгына кирүүгө миллион доллар берген факты сотто каралууда. Бул окуя боюнча бир катар күбөлөр суракка алынып, 13-майдын хронологиясын айтып беришкен. Арасында мурдагы президент Роза Отунбаева баштаган бир катар аткаминерлер бар. Текебаевдин жоктоочулары Атамбаев дагы сотко келип көрсөтмө бериши керектигин талап кылышкан.

"2010-жылдын 13-майында эмне болгону эсимде жок. Бирок 12-май эсимде. Бул күнү чоң митинг болуп, бардыгы качып кеткен. Убактылуу өкмөттүн бир дагы мүчөсү, бир дагы милиция кызматкери, керек болсо ички иштер министри дагы болгон эмес. Бардыгы келемиштей жашынган. Ошондо "Форумдун" кызматкерлери болбогондо 12-майда бийлик алмашып кетмек", деди Атамбаев.

Эскерте кетсек, 2017-жылдын 25-февралында Башкы прокуратура "Ата Мекен" фракциясынын лидери Өмүрбек Текебаевге жана башка адамдарга карата КР Кылмыш жаза кодексинин 303-беренесинин 1-бөлүмү (коррупция) жана 166-беренесинин 4-бөлүмүнүн 2-3-пункттарында (алдамчылык) камтылган белгилер боюнча кылмыш ишин козгогон.

Анын алкагында Өмүрбек Текебаев менен Дүйшөнкул Чотонов кармалган. Россиялык бизнесмен Леонид Маевский Текебаев "Альфа Телеком" (MegaCom) компаниясынын башкармалыгына кирүүгө мүмкүнчүлүк берүү үчүн бир миллион доллар алды деп айтып, депутаттын үстүнөн арыз жазган.

Президент Алмазбек Атамбаевдин маалымат жыйынындагы сөзүн Sputnik Кыргызстан агенттигинин тексттик трансляциясынан окуңуздар>>