БИШКЕК, 12-июл. — Sputnik. Мамлекеттик Дума Россиянын жарандыгын алып жаткан кишилер бере турган анттын текстин бекитти. Бул тууралуу РИА Новости маалымат агенттиги билдирди.
Анттын текстинде жарандык алып жаткан киши Россия федерациясынын жарандыгын өз ыктыяры жана баарын билип туруп кабыл алып жатканы жазылат. Ошондой эле өлкөнүн мыйзамдарын, жарандардын укугун жана эркиндигин, өзүнүн милдеттерин жана Россиянын эркиндиги менен көз карандысыздыгын сактоого, анын маданиятын, тарыхын жана салт-санаасын урматтоого ант берери жазылган.
Мамлекеттик Думанын мамлекеттик түзүлүш жана мыйзамдуулук боюнча комитетинин башчысы Павел Крашенинников билдиргендей, Россиянын паспорту ант бергенден кийин дароо берилет.
Ант берүү тартиби президенттин жарлыгы менен жөнгө салынат.
