БИШКЕК, 3-июл. — Sputnik. Жакынкы келечекте "Манас" эл аралык аэропортун өзгөрүүлөр күтүп жатат. Бул тууралуу Sputnik Кыргызстан агенттигинин мультимедиалык борборунда өткөн маалымат жыйында аэропорттун инвестициялык жана инфраструктуралык өнүктүрүү дирекциясынын директорунун орун басары Нурсултан Белеков билдирди.
Анын айтымына караганда, "Манас" эл аралык аэропорту" ААКтын өнүктүрүү стратегиясынын алкагында 30 долбоор каралган. Алардын бири "Манас" аэропортун реконструкциялоо" деп аталат. Анда үч компонент камтылган.
Биринчиден — аэровокзал комплексин кеңейтүү, унаа токтотуучу 550 орундуу көп кабаттуу жай куруу жана анын кире беришин оңдоо каралган.
"Бардыгыбыз жакын арада аэропорттун сырткы көрүнүшү жапжаңы болорун көрөбүз жана жүргүнчүлөр үчүн да шарттар жакшырат", — деди Белеков.
Анын айтымында, экинчиден аэропорттун жүрөгү болгон учуп-конуу тилкеси оңдолот.
"Эгер ал авиациялык коопсуздук боюнча бардык стандарттарга жооп бербесе, кандай гана кооз терминал куруп койгон менен анын пайдасы жок болот", — деген пикирин Белеков билдирди.
1974-жылы учуп-конуу тилкеси курулуп, андан бери бир да жолу капиталдык оңдоодон өткөн эмес. Аэропорт өз каражатына жыл сайын аны оңдоп, учуп, конууга ыңгайлуу кылып келет. Бирок бүгүнкү күнү капиталдык оңдоодон өткөрүү боюнча долбоор иштелип чыкты. Белековдун айтымында, бул кадам "Манас" эл аралык аэропортунун жетекчилиги үчүн эң маанилүү иштерден болуп саналат.
"Автоунаа сыяктуу эле учактын да дөңгөлөгүн, майын алмаштырып туруу керек. Тилекке каршы, бүгүн биз СССР маалындагы гана учактарды тейлей алабыз. Буюрса жакын арада батышта жасалган учактарды да оңдой алгыдай деңгээлге жетебиз", — деди ал.
"Манас" эл аралык аба майданынын курамына 11 аэропорт жана башка туунду компаниялар кирет.
