Кытай: Иванка Трамптын бут кийим фабрикасында кармалгандар бошотулду

БИШКЕК, 30-июн. — Sputnik. Кытай бийлиги АКШ президентинин кызы Иванка Трамптын бут кийим бренди үчүн продукция тиккен фабрикадагы мыйзам бузууларды жашыруун иликтеген активисттерди бошотту. Бул туурасында РИА Новости Ассошиэйтед Пресс агенттигине шилтеме кылып кабарлады.

Андан соң кармалган башка адамдар да азат болгон.

Буга чейин бут кийим фабрикасындагы жумушчулар үчүн түзүлгөн шарттарды изилдеген активисттердин бири, андан кийин дагы экөө жок болуп кеткендиги айтылган эле. Вашингтон Пекинди кармалгандарды бошотууга чакырган.

Маалыматтарга караганда, активисттер күрөө менен боштондукка чыккан.

Кытайдагы адам укугу боюнча эксперт, Нью-Йорк университетинин профессору Жером Коэн активисттердин мындан ары тагдыры чечиле электигин айтты.

Кишилер жок болуп кеткенден кийин China Labor Watch Huajian Group фабрикасындагы арзан жумушчу күчү, ашыкча иштеген сааттар, жумушчуларга тил тийгизип, сөгүп-саккан жана студенттерин укугун өз пайдасына бузган учурларды тастыктаган докладды жарыяламакчы болгон. Алардын бир катарларында Ivanka Trump брендинин бут кийимдери тигилген.

Huajian Group бардык күнөөлөрдү четке кагып, АКШ президентинин кызынын бренди үчүн бир нече айдан бери продукция тикпей калгандыгын билдирген. Иванка Трамптын компаниясынын президенти Эбигейл Клем алар жаздан, тагыраагы март айынан бери кытайлык бул фабриканын кызматынан колдонбой калганын айткан.

Буга чейин China Labor Watch деп аталган укук коргоо уюмунун баш директору Ли Цянь активисттердин бири Кытайдын түштүк-чыгыш тарабындагы Цзянси провинциясында тыңшоочу аппаратты мыйзамсыз пайдаланды деген шек менен кармалганын билдирген. Ал кармалган киши дагы белгисиз болуп жаткан эки жаран Иванка Трамптын жана башка дагы батыштагы бут кийим боюнча бир канча бренддер үчүн тиккен фабрикаларды иликтеген.