БИШКЕК, 25-июн. — Sputnik. Америка президентинин жардамчысы болуп иштеп жаткан кызы Иванка Трамп бут кийимдин үлгүсүн уурдап алды деген доо боюнча сотко чакырылды. Бул туурасында Bloomberg басылмасына таянып РИА Новости кабарлады.
Aquazzura бренди алар өздөрү иштеп чыккан бут кийимдин үлгүсүн көчүрүп алган деген доо менен Иванка Трампты сотко берген. Алар чыгарган туфлинин баасы 780 доллар турса, ал эми президенттин кызы 150 доллардан сатыкка койгон.
Маалыматка караганда, Иванка сотко 2017-жылдын октябрына чейин барышы керек. Фемида өкүлдөрү президенттин жардамчысына жеңилдик кылып, көрсөтмөнү Нью-Йоркто эмес, Вашингтон шаарында берүүгө макул болгон.
Иванка жана анын күйөөсү Жаред Кушнер АКШ президентинин акча төлөнбөгөн жардамчылары болуп эсептелет.
