БИШКЕК, 29-июн. — Sputnik. Эгерде дүйнө коомчулугу балдар өлүмүн азайтууга жете албаса 2030-жылга карата дээрлик 70 миллион бала беш жашка толбой көз жумат. Мындай маалымат БУУнун Балдар фондусунун жаңы чыгарган анализинде айтылды.
Изилдөө жүргүзүү үчүн бардык ымыркайлар жана беш жашка чейинки курактагы балдар арасындагы өлүмдөрдүн дээрлик 80 пайызы катталган 51 өлкөдөн маалыматтар алынган. Изилдөөлөр көрсөткөндөй, аз камсыздалган калк арасында адам өмүрүн сактап калуу боюнча иш-чараларды кеңейтүү бул өлкөлөрдө жетиштүү жашаган деп эсептелгендерге салыштырмалуу балдар өлүмүн дээрлик үч эсе азайтууга жардам берген.
Алар — эмчек эмизүүгө эртерээк өтүү, антенаталдуу кам көрүү (бала курсакта кезинде камкордук), эмдөөнүн толук курсу, аялды тажрыйбалуу акушердин төрөтүшү, зыяндуу курт-кумурскаларга каршы химиялык дарылар кошулуп жасалган торчолорду колдонуу жана баланын ичи өткөндө, дене табы көтөрүлгөндө же өпкөсүнө суук тийген учурларда медициналык жардам сурап кайрылуу.
Мындай тыянактар өтө маанилүү убакыт аралыгында жасалды. Анткени бул өлкөлөрдүн өкмөттөрү Туруктуу Өнүгүү Максаттарына жетүү боюнча аракеттерин улантып жатат. Маалыматта бул өлкөлөр 2030-жылга карата ымыркайлар жана беш жашка чейинки балдардын чарчап калышын жоюуну максат кылып койгондугу айтылат.
