БИШКЕК, 21-июн. — Sputnik. Астана аэропорту эми "Нурсултан Назарбаев атындагы эл аралык аэропот" деп аталарын Sputnik Казакстан агенттиги жазды.
Казак өкмөтүнүн бул боюнча жарлыгын расмий ЖМКлар жарыялады.
Нурсултан Назарбаевдин аты Казакстанда гана эмес, башка өлкөлөрдөгү ар кайсы объектилерге дагы берилген. Мисалы, Голландия менен Японияда Казакстандын биринчи президентинин атын жоогазын жана хризантема гүлдөрүнүн жаңы сорттору алып жүрөт. Ал эми Түркиянын төрт шаарындагы проспектилери Назарбаев деп аталат. Бул өлкөдө эл башынын айкели дагы коюлган.
Мурдараак казак парламенти өлкө борборунун аталышын "Нурсултан" же "Назарбаев" деп алмаштыруу идеясын көтөрүп чыккан. Бирок президент аларга ыраазычылык билдирүү менен бул демилгени колдоого алган эмес.
