БИШКЕК, 12-июн. — Sputnik. Бишкектин жогорку бөлүгүндөгү кичи райондордо акыркы күндөрү муздак суунун басымы начарлап, айрым жерлерде араң чыгып жатканын Sputnik Кыргызстан агенттигине шаар тургундары Whatsapp каналы аркылуу билдирди.
"Бир канча күндөн бери кичи райондордо суунун басымы начарлады. Өзгөчө 6-кичи райондо айрым убакта суу азайып, араң эле агып калып жатат", — деп айтылат билдирүүдө.
Жай эми башталып жатканына карабай, суунун мынча аз келишине кабатыр болгон шаардыктарга жооп алып берүү максатында "Бишкексууканал" ишканасына кайрылдык.
Мекеменин башкы инженери Владимир Игнатенконун айтымында, суу басымынын азайышы жай мезгилинин келиши жана ысык суунун өчүрүлүшү менен байланыштуу.
Ошондой эле ал ысык суу берилери менен мурдак суу мурдагыдай эле басымга келерин кошумчалады.
Эске салсак, быйыл Бишкек шаарында ысык суу 22-майдан 22-июнга чейин өчүрүлгөн.
