БИШКЕК, 10-июн. — Sputnik. Россиянын тышкы иштер министри Сергей Лавров араб өлкөлөрүн түз диалогго келүүгө чакырды. Бул тууралуу РИА Новости кабарлады.
Маалыматка ылайык, эки өлкөнүн тышкы иштер министрлери Сергей Лавров менен Мухаммед бен Абдуррахман Аль Тани эки тараптуу сүйлөшүүлөрдү өткөрүшүп, Перс булуңундагы абалды талкуулашты.
Анда Лавров Москва башка өлкөлөрдүн ишине кийлигишпей тургандыгын жана араб өлкөлөрүнүн ортосундагы алаканын солгундап жатканына тынсызданып жаткандыгын билдирип, тараптар маселени чечүү үчүн түз диалогго келүүсү зарыл экенин белгилеген.
"Бардык тил табыша албай жаткан тараптар тең укуктуу диалог жана бири-бирин урматтоо жолу менен сүйлөшүүсү керек. Ошол түз диалогдун аркасында тил табышуу болот", — деди Лавров..
Эске сала кетсек, дүйшөмбү күнү Сауд Аравия, Бахрейн, Бириккен Араб Эмирлиги жана Египет өлкөлөрү Катар менен дипломатиялык мамилесин үзгөн. Андан кийин Ливия, Йемен, Мавритания, Иордания, Жибут, Мальдив өлкөлөрү менен Комор аралы да мамилесин солгундаткан. Ал эми Чад менен Сенегал Дохадагы элчилерин чакырып алган.
Аталган өлкөлөр Катарды Жакынкы Чыгыштагы абалды курчутуууга жана террордук уюмдарга колдоо көрсөтүп жатат деп күнөөлөшүүдө.
