БИШКЕК, 10-июн. — Sputnik. Президент Алмазбек Атамбаев 2010-жылы июнда болуп өткөн окуялардын жети жылдыгына карата элге кайрылды.
Өлкө башчы ал каргашалуу окуядан 442 жаран каза таап, миңдеген киши майып болуп, ондогон адам дайынсыз жоголгонун белгилеген.
"Бүгүн ошол күндөрү кан төгүүлөрдү токтотуп, тынчтык менен туруктуулукту орнотуу Кыргызстанга канча кыйын болгонун, элдер, адамдар ортосундагы ишенимди кайтаруу үчүн кандай гана чечимдер, аракеттер көрүлгөнүн эске салгым келет. Андан бери Кыргызстан эл биримдигин жана этнос аралык мамилелерди чыңдоо боюнча өз концепциясын токтоосуз жүзөгө ашырып келатат. Мындай каргаша кайталанбас үчүн бардык чаралар көрүлүүдө", — деп айтылат кайрылууда.
Президент ушу тапта өлкөдө туруктуулук, эл биримдиги улам бекемделип баратканын, коңшу мамлекеттер менен алаканын чыңдалып жатканына токтолду.
Мындан улам Атамбаев тынчтыкты жана эл биримдигин сактап калуу негизги максат экенин баса белгиледи.
"Өлкөдөгү бардык этносторду бириктирүүчү күч болгон, мамлекетке ат берген улуттун тарыхын, маданиятын, тилин Кыргызстанды мекендеген бардык этнос өкүлдөрү билүүгө жана урматтоого тийиш. Этностук тегине жана диний ишенимине карабай, ар бир кыргыз жараны эл-жерибиздин оорчулугун бирдей көтөрүүгө, жакшылыгын бирдей көрүүгө милдеттүү", — деп айтылат президенттин сөзүндө.
Кайрылуунун соңунда президент адамдарды сабырдуу, кечиримдүү, айкөл болууга чакырган.
Июнь окуясын чагылдырган сүрөттөрдү Sputnik Кыргызстан фотолентасынан көрүңүздөр>>
