БИШКЕК, 9-июн. — Sputnik. Чернобыль АЭСинин чектелген аймагында алгачкы мейманкана иштей баштады. Бул тууралуу Украинанын мамлекеттик агенттигинин аталган аймак боюнча башкармалыгы жарыялады.
Мейманкана жүз кишиге ылайыкташкан. "Полесье" деп аталган хостел Чернобыль шаарындагы Киров көчөсүндө жайгашкан.
Андагы ар бир бөлмө заманбап үлгүдө жасалгаланып, меймандар үчүн бекер wi-fi байланышы каралган.
Мындан 31 жыл мурда Чернобыль АЭСинде болгон жардыруудан улам ал жакка жакын аймакка кирүүгө тыюу салынган.
Дүйнөнүн атом энергетикасындагы эң кайгылуу окуя 1986-жылы 26-апрелде болгон. Атом станциясынын төртүнчү энергоблогунда жарылуу болуп, анын кесепетинен Украина менен Белоруссиянын аймагы жабыркап, миңдеген кишилер ууланган.
