БИШКЕК, 30-май — Sputnik. Америка Кошмо Штаты дүйнөдөгү алдыңкы держава статусун жоготту. Мындай пикирин Германиянын тышкы иштер министри Зигмар Габриэль айтканын Der Spiegel журналы жазып чыкты.
Ал ошондой эле Ак үйдүн жүргүзүп жаткан саясатына каршы аракеттерди көрүү керектигин баса белгилеген. Буга "АКШ маанилүү держава катары ишин аткара албай калганы" себеп. Министр, андан сырткары, АКШнын башкалардан алыстоо багытын карманып алганы дүйнөдөгү абалга терс таасирин тийгизип жатканына токтолду.
Габриэль АКШнын президенти болуп Дональд Трамп келгенден кийин эл аралык аренадагы абал өзгөргөнүн айтып, "Батыштын таасири бир кыйла азайганын" белгиледи.
Министр ошондой эле Ак үйдүн миграция жана климаттын өзгөрүшү боюнча иш багытын сынга алды. Анын айтымында жаңы администрациянын бул жааттагы демилгелери абалды ого бетер курчутуп келет.
