БИШКЕК, 26-май — Sputnik. Миңден ашуун волонтерлор "Таза Ысык-Көл" акциясынын алкагында экологиялык ири иш-чарага катышып, көлдүн жээгин тазалайт. Бул туурасында уюштуруучулар билдиришти.
Ыктыярчылар ишемби күнү, 27-майда саат 7:00дө Бишкек шаарындагы "Жеңиш" аянтына чогулуп, коопсуздук чаралары менен таанышкан соң андан ары сапар алат.
Акциянын салтанаттуу ачылышы Бактуу-Долоноту айылындагы ат майданында жана Бөкөнбаев атындагы айылда болот.
"Миңден ашуун активисттер айыл-шаарларды, жээкти таштандылардан тазалайт. Бул ишке жергиликтүү элдин да катышуусу мүмкүн",—деп билдиришти уюштуручулар.
Алардын айтымында, "Таза Ысык-Көл" долбоорунун алкагында 5-майда өткөн акцияда 5 тонна таштанды чогулган. Айнек, желим же пластиктерди өзүнчө жыйнап, Чолпон-Ата шаарындагы кабыл алуучу жайга өткөрүшкөн.
Уюштуруучулар кийинки акция Бишкекте болорун айтышты.
