БИШКЕК, 25-май — Sputnik. Нарын шаардык соту "Макмал" алтын комбинатынын филиалында иштеген беш кызматкерге карата өкүм чыгарды. Бул тууралуу Улуттук коопсуздук мамлекеттик комитетинен кабарлашты.
Үстүбүздөгү жылдын 28-январында жардыруучу каражаттарды жүгүртүү менен алектенген жарандарды аныктоо максатында жүргүзүлгөн рейдде 27 жаштагы А.Кадырбек уулу кармалган. Анын жанынан салмагы 42 килограммга жеткен жардыруучу каражаттар табылган.
Мындан тышкары, алтын комбинатында жардыруу иштерин аткарган Ш.Качкынов, Б.Токтосунов жана тоо адистери Ч.Кожошов менен Ж.Нурмамбетов жардыруучу каражаттарды уурдап сатууга айыпталышкан.
Натыйжада Нарын шаарынын соту тарабынан Качкынов менен Токтосунов күчөтүлгөн тартиптеги колонияда сегиз жыл жаза өтөө өкүмү чыкты. Ошондой эле алардын мүлкү конфискацияланды.
А.Кадырбек уулун беш жылга эркинен ажыратуу өкүмү чыгарылды. Бирок II топтогу майыптыгы эске алынып, үч жылга шарттуу түрдө эркинен ажыратылды.
Кожошов менен Нурманбетовдун ар бирине 30 миң сомдон айып салынды.
