Жээнбеков мектептердин жанына светофор жана жол тосмолорун орнотууну тапшырды

БИШКЕК, 16-май. — Sputnik. Премьер-министр Сооронбай Жээнбеков мектептердин жанына жол чырак жана ылдамдыкты азайтуучу жол тоскоолдуктарын орнотууну тапшырды. Бул тууралуу өкмөттүн маалымат кызматы кабарлады.

Маалыматка ылайык, 16-майда Сооронбай Жээнбеков окуучуларга жол коопсуздугун камсыз кылуу боюнча жумушчу жыйын өткөрдү. Анда өкмөт башчы мамлекеттик органдар алдын алуу иштерин жүргүзбөй жаткандыктан, балдардын катышуусунда жол кырсыгы көп болуп, коомчулук тарабынан нааразычылыктар айтылып жаткандыгына токтолгон.

Ички иштер министри Улан Исраиловтөрт ай аралыгында 1684 жол кырсыгы катталгандыгын, анын ичинде 336 окуя балдардын катышуусунда болгондугун айтты.

Ал эми билим берүү жана илим министри Гульмира Кудайбердиеванын маалыматына ылайык, өлкө аймагындагы 2238 мектептин 30 пайызы чоң жолдун боюнда жайгашып, бул көрсөткүч Бишкекте 32 пайызга жетет.

Жыйында премьер-министр мектепке бара жаткан балдардын коопсуздугун камсыз кылуу үчүн ашыкча күч керектелбестигин белгилеп, мектептердин жанына светофор жана ылдамдыкты азайтуучу жол тоскоолдуктарын орнотууну тапшырды.