Президент Алмазбек Атамбаев 16-майда Кытайга жумушчу сапарынын алкагында Кытай Эл Республикасынын төрагасы Си Цзиньпин менен жолугуп, "Кытай-Кыргызстан-Өзбекстан" темир жолун курууга тиешеси бар маселелерди талкуулады. Бул туурасында Sputnik Кыргызстан агенттигине президенттин маалымат кызматынын жетекчиси Алмаз Усенов айтып берди.
"Жолугушууда президент эл аралык кызматташтык боюнча "Бир алкак – бир жол" форумуна катышууга чакырганы үчүн кытай тарапка ыраазычылык билдирди. Аны менен бирге Кытай Кыргызстандын жакшы кошунасы, өнүгүү боюнча маанилүү жана ишенимдүү өнөктөшү экенин баса белгиледи", — деди Усенов.
Сүйлөшүүлөрдүн жүрүшүндө лидерлер Кыргыз-кытай фондун түзүүгө, "Кытай-Кыргызстан-Өзбекстан" темир жолун курууга тиешеси бар маселелерди талкуулашкан.
Андан тышкары, коопсуздук чөйрөсүндө, маданий-гуманитардык багытта өз ара аракеттешүүнү тереңдетүү жана биргелешкен илимий-практикалык иш-чараларды өткөрүү маселелери тууралуу сөз болгон.
