БИШКЕК, 16-май. — Sputnik. Президент Алмазбек Атамбаев Кытайга болгон иш сапарынын алкагында кесиптеши Си Цзиньпин менен жолугуп, "Кытай — Кыргызстан — Өзбекстан" темир жолун курууга байланышкан маселелерди талкуулады. Бул туурадуу өлкө башчынын маалымат кызматы кабарлады.
Жолугушууда өлкө башчы эл аралык кызматташтык боюнча "Бир алкак – бир жол" форумуна катышууга чакырганы үчүн кытай тарапка ыраазычылык билдирди.
"Өлкө башчылары Кыргыз-кытай фондун түзүүгө, "Кытай — Кыргызстан — Өзбекстан" темир жолун курууга тиешеси бар маселелерди талкуулашты. Андан тышкары, коопсуздук чөйрөсүндө, маданий-гуманитардык багытта биргелешкен илимий-практикалык иш-чараларды өткөрүү маселелери тууралуу сөз болду", — деп жазылат маалыматта.
Ал эми Си Цзиньпин Кытай мындан ары да кыргыз тараптын керектөөлөрүнө жараша конкреттүү долбоорлорду ишке ашыруу жолу менен Кыргызстандын экономикасын бекемдөө ишине жардам берүүнү улантарын белгиледи.
