БИШКЕК, 15-май — Sputnik. Wanna Cry вирустук программасы кыргызстандык жарандын компьютерин жабыркатты. Бул тууралуу Sputnik Кыргызстан агенттигине вирустун курмандыгы болгон Иван Шульдяков билдирди.
Өткөн жуманын аягында Европа менен Азия мамлекеттериндеги бир катар компаниялар менен уюмдарга болгон киберчабуулдан улам мекемелердин иштери үзгүлтүккө учураган.
Аталган вирус компьютерлерди иштен чыгарып, аны калыбына келтирүү үчүн акча талап кылат.
Шульдяковдун айтымында, анын компьютери жума күнү, 12-майда жабыркаган. Экранда "Wana Decrypt0r 2.0" терезеси пайда болуп, үч сааттын ичинде 300 доллар жөнөтүү талабын койгон. Локалдык тармак боюнча бир нече компьютер жабыркаган.
"Көйгөй төмөнкүчө чечилди: антивирусту жаңыртып, компьютердин эсин карап чыктым. Вирус жок кылынганы менен 90 пайызга жакын маалыматтар жоголуп кетти. Мындан тышкары, файлдар дагы жабыркаган", — деди кыргызстандык жаран.
Вирустун жайылышы
Ал эми Guardian басылмасы хаккерлер жалпы 42 миң доллар табышканын жазып чыкты. Болжол менен 150 мамлекеттен 200 миң адам киберчабуулдун курмандыгы болгон.
Адистин кеңеши
Антон Кирсанов вирустан коргонуу үчүн антивирус гана эмес, Windows программасынын жаңыртылып турушу дагы жардам берерин билдирди. Адистин айтымында, Microsoft компаниясы вирустан коргонуучу атайын пакеттерди чыгарган.
