БИШКЕК, 15-май — Sputnik. Билим берүү жана илим министри Гүлмира Кудайбердиева Астана шаарында өткөн химия боюнча эл аралык Менделеев олимпиадасында коло байге алган окуучулар менен жолукту. Бул тууралуу аталган министрликтин маалымат кызматы билдирди.
Жолугушуу учурунда жаш химиктер келечекте илим менен алектене турганын айтып, ата мекендик илимди өнүктүрүүгө салым кошууга даяр экенин айтышты.
"Кыргызстандагы илим учурда оор кырдаалга тушуккан учур, негизги маселелердин бири жаш адистердин жоктугу болууда. Азыр өкмөт тарабынан иштелип чыккан концепция бар, андан сырткары, президент илим тармагын реформалоо боюнча тапшырма берди. Силердей болгон жаш адистер өлкөнүн өнүгүшүнө салым кошот деп ишенем", — деди Кудайбердиева.
Астанада өткөн олимпиадага Кыргызстандын бардык аймактарынан барган жети окуучу катышкан. Анын жыйынтыгында 11-класстын окуучусу Эржигит Абдыкерим уулу (Ош) жана 10-класстын окуучусу Ильяс Батырбеков (Талас) коло байге алышкан.
Бул билим таймашына жалпы жонунан 22 мамлекеттен 120 окуучу катышкан.
