АСТАНА, 29-апр. — Sputnik. Алия Самидин. Кыргызстандык эки окуучу Астана шаарында өткөн 51чи Эл аралык Менделеев олимпиадасында эки коло медалга ээ болду. Бул тууралуу Кыргызстан командасынын жетекчиси Бакыт Боркоев билдирди.
"Эржигит Абдыкерим уулу жана Ильяс Батырбеков аттуу окуучуларыбыз коло медалга ээ болушту. Биз мындан чоң ийгиликт күтүп жатканбыз. Жарыш деген жарыш экен. Буга да ыраазы болушубуз керек", — деди ал.
Эржигит 11-класста окуса, Ильяс 10-класстын окуучусу.
Боркоев олимпидада 11 алтын медалдын жетөөсүн россиялык окуучулар утуп кеткенин белгиледи.
"Менделеев олимпиадасында 11 алтын медалдын жетөөсүн Россия алды. Алардын командасы чындыгында күчтүү", — деди Кыргызстан командасынын жетекчиси.
Ал ошондой эле Кыргызстандан Менделеев олимпиадасына катышкан жети окуучунун ичинен упайлары жогору болгон төрт окуучу Тайландда өтө турган химия боюнча эл аралык олимпиадага катышаарын кошумчалады.
