БИШКЕК, 13-май — Sputnik. Европа менен Азия мамлекеттеринин бир катар ири уюмдары зыяндуу программа пайдаланылган масштабдуу киберчабуулга туш болгонун BBC жазып чыкты.
MalwareHunterTeam деп аталган киберкоопсуздук боюнча эксперттер тобунун маалыматында чабуулга көбүрөөк Россия менен Тайвандын аймагындагы серверлер кабылган.
Ошондой эле сокку алдында Улуу Британия, Испания, Италия, Германия, Португалия, Түркия, Украина, Казакстан, Индонезия, Вьетнам, Япония жана Филиппиндердерги компьютердик системалар да калган.
“Жаңы вирус болуп көрбөгөндөй ылдамдык менен жайылып жатат”, — дешти адистер.
Программа компьютерлерди блокко коюп, андан чыгаруу үчүн биткойн менен төлөм талап кылат.
Россиялык ЖМКлардын маалыматы боюнча Россияда хакерлердин чабуулуна ИИМ менен байланыш операторлорунун серверлери туш болгон.
Ал эми ИИМ мекеменин серверине эч кандай чабуул болбогонун айтып, ЖМКлар маалымдаган иштеги олку-солкулук профилактикалык маселелерге байланыштуу экенин белгиледи.
Буга чейин Улуу Британиянын Улуттук саламаттык сактоо кызматы өлкөдөгү ооруканалардын компьютердик системалары жаңы вирустан улам иштен чыкканын жар салган.
MalwareHunterTeam эксперттеринин айтымында, компьютерлер 2017-жылы пайда болгон WCry/WannaCry аттуу программанын модификациясы делген зыяндуу WanaCrypt0r 2.0 программасынын чабуулуна кабылууда.
