БИШКЕК, 12-май — Sputnik. Жалал-Абад шаарында такси айдоочусун "зордуктадың" деп опузалоо жолу менен акча талап кылган аялдардын тобу кармалды. Бул туурасында облустук ИИБдин мааылымат кызматы аймактык кабарчыга билдирди.
Маалыматка ылайык, 24-апрель күнү жергиликтүү жаран зордуктоо боюнча жалаа жабуу менен эки аял акча алганын айтып милицияга кайрылган.
"Шаарда Токтогул көчөсү менен баратсам бир аял унаама отуруп, баласын шаардан алып, анан үйүнө жеткирүүнү суранды. Бирок бир аздан кийин кызыл түстөгү жеңил машинанын жанына токтотту. Анан эки аял чыга калып эле "сиңдимди зордуктадың" деп жалаа жаап, унаанын техникалык паспорту менен айдоочулук күбөлүгүмдү тартып алды. Муну милицияга жеткирбей бүтүрөрүн айтып менден 15 000 сом алышты", — деп көрсөтмө берген жабырлануучу.
Тергөөнүн натыйжасында соттун өкүмү менен 34 жаштагы аял эки айга камакка алынып, калган экөө үй камагына чыгарылды.
