БИШКЕК, 29-мар. — Sputnik. Көз карандысыз мамлекеттер шериктештиги (КМШ) адамдын динине карап басмырлоого жол бербөө боюнча иш-аракеттерди баштайт. Бул тууралуу Sputnik Белоруссия маалымат агенттиги билдирди.
КМШнын башкы кеңсеси христиан, мусулман жана башка динди тутунгандарга карата басмырлоого жол бербөө долбоорун карап көрөт.
"Бул демилгени Россия көтөрдү", — деп уюмдун маалымат кызматы билдирди.
Документтин долбоорунда башка динди тутунгандарга карата сый-урмат көрсөтүү эң маанилүү нерсе экени баса белгиленип жазылган. Ошондой эле диндер аралык касташууга жол бербөө, диний фанатизм жана экстремизмге жол бербөө, башкаларды кордоо, террордук аракеттерге баруунун алдын алуу да белгиленген.
Документ 7-апрелде Ташкентте өтө турган тышкы иштер министрлер кеңешинин жыйынында кабыл алынары айтылууда. Андан кийин ал Бириккен Улуттар Уюмуна, Европадагы Коопсуздук Келишим уюмуна жана башка эл аралык уюмдарга таратылат.
