БИШКЕК, 11-май — Sputnik. Эмгек жана социалдык өнүгүү министри Таалайгүл Исакунова Чоң-Алай районундагы жер титиреген аймактар — Дароот-Коргон, Карамык, Каратейит, Жекенди жана жер көчкү жүргөн Өзгөн районунун Аюу айылына барды. Бул тууралуу министрликтин маалымат кызматы билдирди.
Андан кийин Исакунова жер көчкү жүрүп, 24 киши набыт кеткен Аюу айылына барып, Ош облусунун бардык райондорунун жана шаарлардын социалдык башкармалыктарынын жетекчилери менен жолукту.
Министр жаратылыш кырсыктары болгон жерде тезинен аракеттерди көрүү боюнча атайын иш-аракеттер иштелип чыкканын баса белгилеп, оор абалга тушуккан жарандарга тезинен жардам берүү керектигин да айтты.
Ошондой эле жарандарды акы төлөнө турган коомдук иштерге — инфраструктураны калыбына келтирүү, анын ичинен Карамык айылындагы Ак-Суу каналын оңдоого тартуу керектигин да кошумчалады.
