Москвадагы "Өлбөс полк" жүрүшүнө кыргызстандыктардын кошулганы жергиликтүү ЖМКларды көңүл кош калтырган жок.
БИШКЕК, 9-май. — Sputnik. Бүгүн Москва шаарында өткөн "Өлбөс полк" жүрүшүнө ак калпак кийген кыргызстандыктар дагы катышкандыгын Sputnik Кыргызстан агенттигинин кабарчысына "Кыргыз биримдиги" коомдук уюмунун вице-президенти Улан Кошматов билдирди.
Расмий түрдө "Өлбөс полк "Кыргызстан" деп аталган биздин коллонага 200 адам кошулмак. Бирок мекендештердин саны андан ашып кетти.
Анын айтымында, "Өлбөс полк" жүрүшүнө катыша турган мекендештер Москва убактысы боюнча саат 14.00дө Белорусский метро станцияларынын жанына чогулушкан.
"Расмий түрдө "Өлбөс полк "Кыргызстан" деп аталган биздин коллонага 200 адам кошулмак. Бирок мекендештердин саны андан ашып кетти. Бара турган жерибиз Кызыл аянт болчу. Ал жактан баарыбыз эстеликке сүрөткө түшүп, үйлөрүбүзгө шаңдуу тарап кеттик", — деди Кошматов.
Ал ошондой эле жүрүшкө кыргызстандыктардын кошулганы жергиликтүү ЖМКларды көңүл кош калтырбаганын кошумчалады.
