БИШКЕК, 9-май. — Sputnik. Шайлоо менен референдумдарды өткөргөн Борбордук шайлоо комиссиясы президенттикке талапкерлигин койгон саясатчыларды күн мурун жүргүзүлүп жаткан үгүт иштерин токтотууга чакырды.
Кезектеги шайлоонун алдында бир нече саясий партия өз талапкерлерин ЖМКлар аркылуу сунушташкан.
БШКнын билдиргенине караганда, талапкерлер тууралуу макалалар эмитен таратылып, анда үгүт сүртүмдөрү байкала баштады.
Мыйзамга ылайык, талапкердин аты-жөнүн, партиянын желегин, логотибин пайдалануу менен маалымат таратуу үгүттөө болуп эсептелет.
БШКдан билдиришкендей, аталган мөөнөттөн тышкаркы убакта үгүт иштерин жүргүзүүгө жол берилбейт.
Президенттик шайлоону 2017-жылдын 19-ноябрында өткөрүү пландалууда.
Буга чейин талапкер катары экс-премьер-министр Темир Сариев, "Өнүгүү — Прогресс" партиясынын лидери Бакыт Төрөбаев, "Ата Мекен" фракциясынын төрагасы Өмүрбек Текебаев жана "Республика — Ата-Журт" фракциясынын лидери Өмүрбек Бабанов көрсөтүлгөн.
