БИШКЕК, 8-май. — Sputnik. Премьер-министр Сооронбай Жээнбеков 7-майда Чоң-Алай районуна караштуу жер титирөө болгон Кара-Тейит, Кара-Мык, Жекенди жана Шибээ айылдарына барып, эл менен жолукту. Ал окуу процессин үзгүлтүккө учуратпоо үчүн мобилдүү мектептерди уюштурууну тапшырды. Бул туурасында Өкмөттүн маалымат кызматы кабарлады.
Жер силкингенде жергиликтүү оорукана, орто мектеп да жабыркаган.
Ал жерден Өзгөчө кырдаалдар министринин (ӨКМ) орун басары Равшанбек Рысбаев акыркы кезде Чоң-Алай районунда түрдүү магнитудадагы 16 жер титирөө катталган болсо, анын 8и төрт баллдан жогору болгонун айтты.
Жалпысынан 993 турак үй текшерүүдөн өтүп, анын сегизи жарактан толук чыккан. 529у авариялык абалда калып, 456сы түрдүү оңдоолорго муктаж экени аныкталды.
Жабыркаган жергиликтүү элге 510 чатыр тигилип, ага 2964 адам жайгаштырылган. Учурда жарандык коргоо органдары келтирилген чыгымдарды аныктоо иштерин жүргүзүүдө.
Өкмөт башчы тиешелүу мамлекеттик органдарга окуу процессин үзгүлтүккө учуратпоо үчүн, мектеп окуучуларына мобилдүү билим берүү мекемелерин уюштурууну тапшырды.
Ошондой эле жабыркаган айылдык пункттарга керектүү болгон курулуш материалдарын өз баасында жеткирүү иштерин уюштуруу маселеси да тапшырылды.
Ал жерде камсыздандыруу маселеси да көтөрүлгөн.
"Ал дагы бир жолу өрттөн, жаратылыш кырсыктарынан турак жайды камсыздандыруунун маанилүүлүгүн белгилеп, атайын ушул максатта Мамлекеттик камсыздандыруу уюму түзүлгөнүн билдирди. Камсыздандыруу төлөмү айыл тургундары үчүн жылына 600 сомду түзүп, камсыздандыруу төлөө учурунда 500 миң сомго чейин төлөнөт", — деп билдирди маалымат кызматы.
