БИШКЕК, 7-май. — Sputnik. Чоң-Алай районунда улам кайталанып жаткан жер титирөөдөн жабыркаган тургандарга дарыгерлер күнү-түнү нөөмөткө туруп жардам көрсөтүп жатат. Бул туурасында Саламаттык сактоо министрлигинин маалымат кызматы кабарлады.
Билдирмеге караганда, дарыгерлер 1500 адамды медициналык кароодон өткөргөн. Алардын 572си 14 жашка чыга элек балдар болгон. Ал эми экөө ооруканага жаткырылып, абалы туруктуу. Жеринде 54 дарыгер иштеп, алты Тез жардам унаасы тартылган.
Белгилей кетсек, 3-майда саат 10:47те Тажикстандын аймагында очогунда күчү 7 баллга жеткен жер титиреген. Анын таасири Кыргызстанда дагы сезилген. Жер титирөө Баткен облусунан түштүк-чыгышты карай 120 чакырым, Ош шаарынан түштүк-батышты карай 192 чакырым алыстыкта катталган. Андан кийинки күндөрү да бир нече ирет жер силкинген. Мунун кесепетинен Чоң-Алай районунда бир нече социалдык мекемелердин имараттары жана турак жайлар авариялык абалга келип, 2964 жаран чатырларга көчүрүлгөн.
