БИШКЕК, 5-май. — Sputnik. Ысык-Көл облусунун "Тамга" санаторийинин аймагында "Сакура" багынын ачылышы болгонун Кыргызстандын Тышкы иштер министрлигинен кабарлашты.
Билдирмеге караганда, иш-чарага мамлекеттик органдардын өкүлдөрү, Жогорку Кеңештин депутаттары, коомдук ишкерлер жана Япониядан келген коноктор катышкан.
"Сакура багы" Япониянын Кыргызстандагы консулу, Куралдуу күчтөр штабы жана Тышкы иштер министрлигинин колдоосу астында ачылды", — деп айтылат маалыматта.
Ачылыш аземдин алкагында иш-чаранын катышуучулары сакуранын көчөттөрүн отургузушкан.
Белгилей кетсек, экинчи дүйнөлүк согуштан кийин "Тамга" санаторийин курууга япониялык аскер туткундары катышкан. 125 туткун Ысык-Көлдө эки жыл кармалып, бири дагы каза тапкан эмес. Алар 1948-жылы мекенине аман-эсен кайткан.
