БИШКЕК, 5-май. — Sputnik. Москванын чок ортосунда кароосуз калган имарат өрттөнүп кеткен. Бул тууралуу РИА Новости Россия ӨКМине шилтеме берип кабарлаган.
Алдын ала маалыматтар боюнча, өрт имараттагы таштандынын күйүшүнөн улам чыккан.
"Учурда өрт өчүрүлүп, жалпысынан тилсиз жоонун кесепетинен үч миң чарчы метр аянт күйүп кетти. Бактыга жараша, жабыркагандар катталган эмес", — деп жазылат маалыматта.
Өрт катталган жерде ӨКМдин 147 кызматчысы жана 45 атайын техника иштеп жатат. Кырсык болгон жерге ошондой эле Москва авиациялык борборунан Ка-32 вертолету учуп барган.
