ОШ, 2-май — Sputnik. Өзгөн районундагы Аюу айылынын 26 жаштагы тургуну Мухиддин Назарбаев бир тууган карындашы Гүлайым Назарбаеванын сөөгүн жерге берип, кабыргасы кайышып, кайгыга батып турган кези.
Ал көчкү жүрүп, жер алдында калган атасы Маматали Коргонбаев менен карындашы Гүлайымдын тирүү табылып калаарынан үмүт артып жаткан.
"Жер көчкү үйдү сүрүп жарга такап коюптур. Үйүбүздүн башы гана көрүнөт. Кечээ күнү карындашымды куткаруучулар таап чыгышып, аны жерге бердик. Ал мурда кандай уктаса ошол абалда, тошокко оронуп жаткан боюнча кете бериптир. Денеси эч нерсе болгон эмес. Бетинде бир аз когоргон жери бар экен. Атам башка бөлмөдөгү керебетте уктачу. Азыр куткаруучулар ошол бөлмөнү божомолдоп казып жатышат", — деди Назарбаев.
Кырсык болгон күндөн бир күн мурда Мухиддин апасы кичүү баласы Нуридинди алып Россияга келген болчу. Алар акыркы мүнөттөргө чейин жакындарын тирүү табабыз деп үмүт кылышкан.
Назарбаев Аюу айылында көчкү коркунучу болгондуктан Өзгөн шаарынан үй сатып алууга аракет кылышканын айтты.
Мухидин 50 жаштагы атасы Маматали Коргонбаев, 20 жаштагы карындашы Гүлайым Назарбаева менен кошо атасынын бир тууган иниси Икрам Коргонбаевди анын аялы жана төрт баласы жалпы сегиз жакын адамын жоготкон.
Белгилей кетсек, 29-апрелде эртең менен саат 6:40тар чамасында Өзгөн районунун Зергер айыл аймагындагы Аюу айылында көлөмү 200 миң метр куб жер көчкү жүрүп, алдын ала маалымат боюнча 24 кишини басып калган.
