Таңда күтүлбөй келген кырсык Гүлбахар Алиеванын үй-бүлө мүчөлөрүнөн тогуз адамды алып кетти.
"Бул үйдө кайнатам менен кайненем калган болчу. Өзүбүз мал алып айыл четинде чыгып кеткен элек. Ал күнү кечинде 11-класста окуган балам менен кайнежемдин баласы, аркы айылда жашаган кайын сиңдим жаш баласы менен ата-энесинен кабар алганы келип түнөп калышкан экен. Коңшу үйдө кайнагам аялы, эки кызы менен жашачу. Кайнежемдин баласы гана сыртка качып чыгууга үлгүрүптүр. Калганынын баары топурак алдында калды", — деди боздогон эне.
Ал жолдошу беш баласы менен калды.
Айылдын дагы бир тургуну Абдирашид Калыков аялы, эки баласы, келини жана эки небересинен айрылып калды.
"Мын сыртта болчумун. Көчкү кандай келгенин көрбөй калдым. Бир убакта шамал болгондой болду, артымды карасам үй жок, чаң болуп эле эч нерсе көрүнбөй калды. Бир заматта баарынан айрылып калдым", — деди Калыков.
Жакын туугандарынан жетөөнү жоготкон Мухиддин Назарбаевдин апасы кырсыктан бир күн мурда Россияга иштегени барып, бирок суук кабарды угуп кайра эле артка кайтып келе жаткандыгын айтат.
"Араң эле турам. Апам келип көчкүнү көзү менен көрсө эмне болоор экен деп кабатырланып жатам. Жалгыз карындашым жер астында кала берди. Аялым, апам, эки иним болуп Россияда жүргөнбүз. Бул жакта атам менен карындашым эле калган болчу. Карындашым да шаарда окучу, дем алыштан улам айылга келген экен. Бир тууган агам дагы төрт баласы менен топурак алдында калды", — деди Назарбаев.
Издөө иштери бүгүн да саат 10.50дө башталып, ага 400 адам тартылган. Адистердин айтымында, көчкүнүн бийиктиги болжол менен 4,5-5 метрди түзөт.
Аюу айылы Өзгөндүн борборунан 30 чакырым алыстыкта жайгашкан. Аталган аймакта 248 үй-бүлө, ал эми киши саны менен алганда 1800гө чукул адам жашайт.
