БИШКЕК, 26-апр. — Sputnik. Коомдук жайда тамеки тартууну чектөө киргизүүнү алгач Жогорку Кеңештен баштоо керек. Бул тууралуу "Бир Бол" фракциясынын депутаты Акылбек Жапаров парламентте коомдук жайларга тамеки тартууну чектөө боюнча мыйзам долбоору каралып жатканда билдирди.
Аталган мыйзам долбоору кызуу талкууга алынып, көпчүлүк эл өкүлдөрү мыйзам иш жүзүндө иштебей калышы мүмкүндүгүн айтышты.
"Мыйзам иш жүзүндө иштебей калышы мүмкүн. Андыктан алгач чектөөнү ЖКда киргизип, байкап көрбөйлүбү?" — деди Жапаров.
Ага улай мыйзам долбоорунун демилгечиси Дастан Бекешев ЖКда тамеки тартууга чектөө киргизүү боюнча тишелүү органдардын күчү жетпей жатканын айтып, Ак үйдүн ажатканасында тамеки тарткандарды сынга алды.
Белгилей кетсек, мыйзам долбоору боюнча эки башка демилге сунушталууда. Дастан Бекешовдун сунушу боюнча тамактануучу жайлар тамеки тарткандар үчүн атайын кабина ачышы зарыл. Ал эми экинчи демилге боюнча тамактануучу жайларда такыр эле тамеки тартууга тыюу салынат.
