БИШКЕК, 24-апр. — Sputnik. Тажикстан менен чектеш Баткен районунун Кара-Бак айылында 1200 адамга ылайыкталган облустагы эң чоң мечит колдонууга берилди. Бул туурасында аймактык кабарчы билдирди.
Кара-Бак айыл өкмөтүнүн башчысы Тургунбай Нишанбаевдин пикиринде,эки өлкөнүн чектешкен аймагына салынган мечиттер чек арадагы жаңжалдардын алдын алууга да жардам берет.
"Кошуна Тажикстандын Исфара районунун аксакалдары Кара-Бак айылынын аксакалдары менен бат-бат жолугуп, мечитте жума намаздарын чогуу окуп элди тынчтыка үндөп турат", — деди ал.
Кара-Бак айылдык кеңешинин төрагасы Абдикарим Каламбеков алардын айылы суицид, кылмыштуулук саяктуу терс көрүнүштөрдөн оолагыраак экенин айтты.
Жергиликтүү бийликтин өкүлү учурда Кара-Бак айылында 10 миңге жакын эл жашай тургандыгын кошумчалады.
